د انجنیری پوهنځی د ریس وینا
الحمد لله و الصلاة والسلام علی رسول الله، وبعد:
انجنیران د زیربنایي او بنسټیزو کارونو په ترسره کولو کې د ټولو سرلاري دي او انجنیري پوهنځی په دې برخه کې مسلکي کدرونه روزي او ټولنې ته یې وړاندې کوي.
د دې سپېڅلي مسلک لارویان د بېلا بېلو فیزیکي قوانینو، ریاضیکي معادلو او میخانیک څخه په ګټه اخیستنې سره د بېلابېلو رغنیزو کارونو لکه: د ودانیو، بندونو، پلونو، تونلونو، سړکونو، اوبو رسونې، برېښنایي انرژي د برابرولو، برقي شبکو د جوړولو، د ودانیو د ډيزاین، ساتنې او نورو ورته دندو د ترسره کولو له لارې انسانانو ته د هوسا ژوند نوې او غوره لار برابروي.
دې موخې ته د رسېدلو لپاره په لوړه کچه او ښه کیفیت د انجنیري علومو زدهکړې او هغو وړتیاوو ته اړتیا ده چې په مرسته یې وکولای شي تیوریکي زدهکړې په عملي ډګر کې پلي کړي.
د افغان لوړو زدهکړو مؤسسې د انجنیري پوهنځی تل هڅه کوي چې دیني او اکاډمیکو ارزښتونو ته په درناوي، متخصص، مسؤولیت منونکي، ملي ګټو ته ژمن او د ګران هېواد ودانولو ته هوډمن انجنیران وروزي.
انجنیري پوهنځی د مسلکي او تجربه لرونکو علمي کدرونو په درلودلو سره په دوه څانګو (سېول او برق) کې فعالیت کوي او په دواړو برخو کې یې تر اوسه څو دورې محصلان فارغ کړي.
زموږ ستره موخه ټولنې ته خدمت کول او په پوهې سمبال محصلان روزل دي څو د راتلونکو نسلونو لپاره الګو وګرځو.
د پوهنځي د رئیس په توګه، په ټولیزه بڼه د انجنیري پوهنځي راتلونکي ته خوښبین یم او هیله لرم چې نوموړی پوهنځی به یوه ورځ په ملي او بین المللي کچه د یو ځانګړي نوم او شهرت درلودونکی وي. او داسې علمي کدرونه به پکې روزل کیږي چې په اسلامي او ملي روحیه سمبال، شپه او ورځ به د هېواد د ابادۍ او سمسورتیا لپاره زیار باسي.
د پرمختللي، ودان او سوکاله افغانستان په هیله!
ډپلوم انجنیر حفیظ الله “سادات”
د انجنیري پوهنځي رئیس