د شرعیاتو پوهنځي د رئيس وینا
افغان د لوړو زدهکړو موسسې د خپل فعالیت له پیل سره سم په کال ۱۳۹۱ لمریز کال کې د شرعیاتو پوهنځی تاسیس کړ، یاد پوهنځی خپلې ديندارې اسلامي ټولنې د پرمختګ او ځان بساينې لپاره د ديني علومو لکه: تفسیر، حدیث، فقه، اصول فقه، دعوت، اسلامي ثقافت، تاریخ او تمدن زده کړې وړاندې کوي.
د شرعياتو پوهنځی ټولنې ته په ګڼو ټولنیزو څانګو کې علمي کدرونه وړاندې کوي، د بیلګې په توګه: قاضيان، څارنوالان، د اسلامي سیاست او اقتصاد پوهان، خطیبان، امامان، داعیان، د پوهنتونو او ښوونځیو استاذان.
د افغان لوړو زده کړو مؤسسې په کچه د شرعیاتو پوهنځی زیات علمي کدرونه لري چې نژدې اتیا سلنه يې دکتوران او ماستران دي، همداراز یاد پوهنځی د استاذانو د ګمارنې په اړه تخصص او تجربې ته ژمن دی.
افغان د لوړو زده کړو مؤسسه ویاړي چې د هېواد په کچه یوازېنۍ تحصیلي نهاد دی چې ښځينه څانګه يې په بشپړ ډول په تدریسي او اداري چارو کې جلا ده، په یو سالم او خوندي چاپېریال کې يې خویندو ته د لوړو زده کړو د ترلاسه کولو غوره زمینه برابره کړې ده چې د هرې دیندارې کورنۍ خپلو لوڼو او خویندو ته همدا هیله ده.
د شرعياتو پوهنځي د رئيس په توګه د شرعي علومو ټولو مينوالو ته ډاډ ورکوم چې موږ پر خپلې کړې ژمنې ولاړ یو، د الله تعالی په مرسته به ټولنې او هېوادوالو ته داسې علمي کدرونه وړاندې کوو چې پر خپل پالونکي بشپړه بروسه ولري، او د ژوند په بېلابېلو برخو کې د دین او هېواد د خدمت جوګه وي.
دوکتور محمد طارق فاروقي