د افغان پوهنتون د رئيس يادښت
الحمد لله الذي أحل البیع وحرم الربا والصلاة والسلام علی النبي التاجر الناصح الأمین الذي حثنا علی الکسب الحلال وحذرنا من الکسب الحرام وعلی آله وصحبه أجمعین، وبعد:
افغان پوهنتون چې د افغان بنسټ د علمي او تحصيلي پروګرامونو یوه عمده برخه ده، له کلونو راهیسې وطنوالو او په ځانګړې توګه ځوانانو ته په سالم چاپېریال او اسلامي فکر تحصیلي خدمات وړاندې کوي، زیار باسي چې د محصلانو د دیني او عصري علومو سمبالښت په موخه د غني نصاب ترڅنګ، اړین او د لومړیتوبونو پر بنسټ نوښتونه ترسره کړي.
اوسمهال بانکوالي د ژوند یوه مهمه اړتیا ګڼل کيږي، چې نژدې د ټولنې هر وګړی پکې ښکېل دی، دا چې تر ډېره د مروجې بانکوالۍ اساس “سود” دی او سود اسلام حرام ګرځولی دی، باید هڅه وسي چې مسلمانان ورڅخه وژغورل سي او د مروجې بانکوالۍ بدیل ټولنې ته وړاندې سي.
په دې لړ کې له لسیزو را پدېخوا علماوو خپلې هلې ځلې کړي دي، او اسلامي ټولنې ته يې د اسلامي بانکوالۍ په نوم بدیل وړاندې کړی دی، اوسمهال په پوهنتونو او مدارسو کې د یاد مضمون تدریس اړین ګڼل کيږي خو له بده مرغه په ملي ژبو کوم معیاري کتاب شتون نه درلود؛ نو د افغان پوهنتون د علمي څېړنو مدیریت په دې لړ کې کتاب چمتو کول د خپلو څېړنیزو پروګرامونو برخه وګرځوله؛ څو تر ممکنه بریده د دغې تشې د ډکولو کوښښ وکړي او داسې کتاب چمتو کړي چې د پوهنتونو ترڅنګ په مدارسو کې هم د متخصصو طالبعلمانو د استفادې وړ وګرځي.
په همدې موخه د افغان پوهنتون د اقتصاد او شرعیاتو پوهنځي استاذ مفتي عبد الحق حقاني چې له کلونو راهیسې په یادو پوهنځیو کې د تدریس چارې پرمخ بیايي د اسلامي اقتصاد او بانکوالۍ په اړه دغه کتاب چمتو کړ، نوموړي د کتاب لیکلو پرمهال زیار اېستلی چې علمي او ګټور مواد را ټول کړي او د کتاب ژبه روانه وساتي؛ څو هر لوستی يې ولوستلی سي، افغان پوهنتون له نوموړي څخه مننه کوي او په راتلونکې کې ورته له الله جل جلاله څخه د لازیاتو بریاوو توفیق غواړي.
افغان لوړو زده‌کړو مؤسسې د نصاب کمېټې